Malampusong gipahigayon ang usa ka Drug Awareness ug Anti-Vaping Symposium sa Covered Court sa Barangay Biasong niadtong Hulyo 18, 2025.
Ang maong kalihokan gipangunahan sa mga personahe sa Dipolog City Police Station, ilawom sa liderato ni PSSg Mariel M. Otanio, nga nagserbisyo isip Double Barrel PNCO, uban sa pakigtambayayong ni Hipolito Dalmacio, usa ka rehistradong nars gikan sa City Health Office.
Gipasiugdahan kini sa Barangay Anti-Drug Abuse Council (BADAC) sa Biasong, isip kabahin sa padayon nga kampanya batok sa droga ug pagpasiugda sa himsog nga lifestyle sa komunidad.
Mitambong sa maong symposium ang mga residente sa barangay, ilabi na ang mga Persons Who Use Drugs (PWUDs), nga gitumong ma-edukar kabahin sa peligro sa paggamit sa ilegal nga droga ug vaping.
Lakip sa mga hisgutanan mao ang epekto sa droga sa lawas ug hunahuna, kalambigitan niini sa relasyon sa pamilya, ug ang delikado nga epekto sa paggamit sa vape ilabina sa kabatan-onan.
Kini nga inisyatibo usa sa mga paagi sa gobyerno aron mapabakod ang kahibalo sa katawhan, mapalig-on ang kampanya sa rehabilitasyon, ug mapaambit ang panawagan sa usa ka luwas ug himsog nga panginabuhi.(Jumalisa Papa)
Source: Dipolog CPS