Aron mapalapdan ang kahigayonan sa panginabuhian sa mga inahan, nagpahigayon og Online Freelancing Training ang Department of Science and Technology Regional Office IX (DOST-IX) ug Department of Information and Communications Technology (DICT) Zamboanga del Norte alang sa usa ka women’s group.
Kabahin kini sa selebrasyon sa National Women’s Month, nga gihimo sa DICT Building sa Barangay Biasong ug gitambongan sa mga miyembro sa Multidimensional, Assiduous Mothers Association (MAMA), usa ka organisasyon sa mga inahan sa Dipolog City.
Tumong sa programa ang paghatag og digital skills sa mga partisipante aron makahimo sila og trabaho gikan sa ilang panimalay pinaagi sa online freelancing. Pinaagi sa maong training, gilauman nga mas daghang miyembro ang makasulod sa online work ug makasuporta sa ilang pamilya bisan nagpabilin sa balay.
Nagpahayag usab ang DOST-IX ug DICT nga magpadayon sila sa pagpalapad sa mga programa nga naggamit sa teknolohiya aron matabangan ang kababayen-an nga mahimong mas lig-on sa ekonomiya ug aktibong partisipante sa ilang komunidad.(IKEN B. GULLEM)
Source: DOST Regional Office No. IX