Mibisita sa buhatan ni Dipolog City Mayor Roberto Y. Uy kaniadtong Marso 26, 2026, ang National Master nga si Joemel P. Narzabal, 16 anyos nga estudyante sa FEU ug lumad sa Barangay Olingan, aron ipahibalo ang iyang bag-ong mga kalampusan sa larangan sa chess.
Si Narzabal bag-ohay lang gikoronahan isip kampeon sa National Youth and School Chess Championships nga gipahigayon sa Negros Oriental Convention Center sa Dumaguete City niadtong Marso 19–24, 2026. Nailhan usab siya isip unang Chess Master gikan sa Dipolog ug miyembro sa Philippine Chess Team nga giila sa National Chess Federation of the Philippines (NCFP).
Apil sa iyang uban pang mga nahimo ang pagkaplag ikaduhang pwesto sa 20th Malaysian Chess Festival 2025 ug ang pagrepresentar sa nasud sa Asian Schools Chess Championships 2024 sa Bangkok, Thailand.
Mikuyog kaniya sa maong courtesy visit si kanhi City Mayor Edelburgo “Bebs” Cheng, Coach Ronald T. Solon, Trainer Michel Ambuang, ug iyang amahan nga si Joefellie Narzabal.
Ang maong pagbisita nagpakita sa garbo sa Dakbayan sa Dipolog sa pag-amuma sa mga batan-ong talento nga padayon nagdala og dungog sa siyudad sa nasyonal ug internasyonal nga kompetisyon.(IKEN B. GULLEM)
Source: Dipolog City Government