Subay sa kasaulogan sa World Teachers’ Day, ang Dipolog City Division Teachers’ Federation (DCDTF) manguna sa mga kalihokan isip culmination activities nga pagapartisipahan sa tanang mga magtutudlo sa Dipolog City Division karong Oktubre 5, 2026.
Sa buntag sa maong adlaw, ipahigayon ang hiniusang kalihokan sa Zamboanga del Norte Convention and Sports Center (ZNCSC) diin magtapok ang mga magtutudlo gikan sa tanang mga tulunghaan ubos sa Dipolog City Division.
Kabahin sa programa ang awarding ug pag-ila ngadto sa mga magtutudlo nga mipakita og dakong kakugi ug dedikasyon sa pagtudlo ug pag-umol sa mga kabatan-onan.
Gitinguha sa mga opisyal sa DCDTF nga ang tanang mga magtutudlo mahatagan og tukmang pag-ila ug pahalipay isip pagpasalamat sa ilang matinud-anon ug walay puas nga pagserbisyo sa edukasyon.
Human sa hiniusang kalihokan, mobalik ang mga magtutudlo sa ilang tagsa-tagsa ka tulunghaan diin ipahigayon ang nagkalain-laing mga kalihokan isip pagpasidungog ug pagpasalamat sa mga magtutudlo.
Sa pagkahapon, maghiusa na usab ang mga magtutudlo sa usa ka serye sa mga kalihokan sa Dipolog City Boulevard. Lakip niini ang fun run ug boodle fight nga gitumong aron mapalig-on ang panaghiusa ug camaraderie sa mga magtutudlo.
Sa pagpangandam alang sa maong dakong kasaulogan, mibisita kaniadtong Septiyembre 15 ang mga opisyal sa DCDTF sa buhatan ni Gov. Darel Dexter T. Uy aron mangayo og suporta ug pormal nga mag-imbitar kaniya isip pinasidunggang dinapit sa kalihokan sa Oktubre 5.
Ang maong selebrasyon mahimong higayon alang sa mga magtutudlo sa Dipolog City Division nga maghiusa, magpasalamat, ug magselebrar sa ilang importante nga papel sa pag-edukar ug paghulma sa kaugmaon sa mga kabatan-onan.(IKEN B. GULLEM)
Source: Zamboanga del Norte Provincial News Network