Malampusong gipahigayon sa Bureau of Fire Protection Region 9 ang Digital Examination alang sa mga aplikante sa Fire Officer 1 sa nagkalain-laing testing centers sa rehiyon isip kabahin sa merit-based ug transparent nga proseso sa recruitment.
Gipatigayon ang eksaminasyon sa Zamboanga City, Sindangan ug Dipolog City sa Zamboanga del Norte, Ipil sa Zamboanga Sibugay, Jolo sa Sulu, Pagadian City sa Zamboanga del Sur, ug Isabela City sa Basilan aron mas mapaduol ug mapadali ang pag-apil sa mga aplikante gikan sa lain-laing probinsiya.
Sumala sa BFP Region 9, ang sabayang pagpahigayon sa digital examination nagpakita sa ilang paningkamot nga masiguro ang patas nga oportunidad, integridad, ug organisadong proseso sa pagpili sa mga kwalipikado ug angayan nga mahimong sunod nga Fire Officer 1.
Gipasalamatan usab sa Bureau of Fire Protection Region 9 ang tanang aplikante sa ilang dedikasyon ug propesyonalismo ug gihangyo silang ipadayon ang ilang pagpangandam alang sa mosunod nga hugna sa recruitment process.(JENIFFER JR. DELICA)
Source: Bureau of Fire Protection Region IX