Miadto sa Dakbayan sa Dapitan ang iladong Kalinga mambabatok nga si Melanie Maite Ambatang aron mangulo sa duha ka adlaw nga Batok Session ubos sa Timpla ng Sining at Kultura, kabahin sa selebrasyon sa Kinabayo Festival 2026.
Sa wala pa gisugdan ang kalihokan, mibisita si Ambatang sa Balay Hamoy Museum aron mailhan ang kasaysayan ug panulondon sa Dapitan. Si Ambatang usa ka kaliwat ug tinun-an sa bantugang tattoo master nga si Apo Whang-Od.
Human sa museum tour, gisugdan ang Batok Session sa Localhost Workspace and Café diin ang mga rehistradong partisipante nakasinati sa tradisyonal nga hand-tapped tattooing sa Kalinga. Ang kalihokan magpadayon hangtod Hulyo 24.
Gi-organisar ang maong cultural activity sa Localhost Workspace and Café sa pakigtambayayong sa City Government of Dapitan ug Department of Tourism Region IX aron mapalawom ang pag-apresyar sa katawhan sa tinuod nga Filipino arts ug kultura. Napuno usab ang tanang slots alang sa Dapitan leg sa maong kalihokan.(JENIFFER JR. DELICA)
Source: Dapitan City Government