Mas mapadali na ang pagtukod sa mga classroom sa Dapitan City human mipirma si Mayor Evelyn “Belen” T. Uy sa usa ka Memorandum of Agreement (MOA) uban sa Department of Education nga nagtugot sa mas episyenteng implementasyon sa school building projects.
Ang kasabutan kabahin sa bag-ong probisyon sa 2026 national budget nga naghatag og mas dako nga papel sa mga local government units sa pagtukod sa mga classroom, imbes nga maghulat pa sa dugay nga proseso sa una nga sistema.
Pinaagi niini, ang siyudad makahimo na sa pagpatuman sa mga proyekto nga mas dali ug mas angay sa aktuwal nga panginahanglan sa mga eskwelahan.
Kini nga inisyatiba gipasiugdahan sa League of Cities of the Philippines ubos sa liderato ni Joy Belmonte ug Francis Zamora, nga nagtumong sa pagpalig-on sa papel sa LGUs isip frontline partners sa paghatag og batakang serbisyo sama sa edukasyon.
Gipaluyohan usab kini ni Sonny Angara, Secretary sa DepEd, ug ni Bam Aquino, Chair sa Committee on Basic Education sa Senado, nga nagdasig sa mas aktibong partisipasyon sa lokal nga panggamhanan sa pagpalambo sa imprastraktura sa edukasyon.(IKEN B. GULLEM)
Source: City Government of Dapitan