Gisugdan na sa City Government of Dapitan ang house-to-house nga pag-apod-apod sa 10-kilong premium Jasmine rice ngadto sa mga benepisyaryo sa walo ka barangay, aron masiguro nga matag pamilya makadawat sa ilang food assistance nga luwas ug walay kahasol.
Kabahin kini sa selebrasyon sa Kinabayo 2026 ug nahimong posible pinaagi sa panagtinabangay sa City Government of Dapitan, Provincial Government of Zamboanga del Norte, 1st District Congressional Office, ug National Government. Ang maong programa gipondohan sa Department of Social Welfare and Development (DSWD) ubos sa national social assistance program.
Gipangulohan ni Iolus Adasa sa 1st District Congressional Office ang distribusyon uban sa mga personnel sa siyudad. Sa pagkakaron, gipahimuslan na sa mga benepisyaryo sa Barangays Dawo, Banonong, Sta. Cruz, Potol, Linabo, Bagting, Cawa-Cawa, ug Talisay ang maong ayuda.
Samtang, dako ang pasalamat sa mga residente sa maayong panahon sa pag-abot sa food assistance, diin dako kini nga tabang sa ilang adlaw-adlaw nga panginahanglan ug sa pagpagaan sa gastohan sa ilang pamilya.
Gilaoman nga mahuman sulod sa semana ang distribusyon aron masiguro nga ang tanang kwalipikadong panimalay makadawat sa ilang 10-kilong bugas sa dili pa ang kinatumyan sa pista.(IKEN B. GULLEM)
Source: Dapitan City Government