Padayon nga gipalig-on ang panginabuhian sa mga benepisyaryo sa Project LAWA at BINHI sa Kalawit, Zamboanga del Norte pinaagi sa mga pagbansay ug dugang nga suporta aron masiguro ang malungtarong epekto sa programa.
Kabahin kini sa Stage 3 Sustainability sa proyekto nga gipatuman pinaagi sa panagtambayayong sa Office of the Provincial Agriculture (OPAg), Municipal Social Welfare and Development Office (MSWDO), Municipal Agriculture Office (MAO), ug Local Disaster Risk Reduction and Management Office (LDRRMO).
Atol sa kalihokan, gipresentar sa OPAg ang Agribusiness and Marketing Services ubos sa EGBU Program, gisundan sa lecture sa food preservation ug live demonstration sa pagproseso sa kalabasa aron madugangan ang kantidad sa mga produktong agrikultural ug mapalapad ang oportunidad sa merkado.
Gihatagan usab og family food packs ang mga partner-beneficiaries isip kabahin sa padayon nga suporta sa implementasyon sa Project LAWA at BINHI ug sa pagpalig-on sa ilang kapasidad sa panginabuhian.(IKEN B. GULLEM)
Source: FO IX- Project LAWA at BINHI