Nakapasundayag og talagsaong kalampusan sa akademya ang 70 ka benepisyaryo sa Dipolog City Scholarship Program human malampusong nakagradwar sa kolehiyo, lakip ang usa ka Magna Cum Laude ug tulo ka Cum Laude.
Nanguna sa mga graduates si Shimeih Klein C. Montefalcon nga nakab-ot ang titulo nga Magna Cum Laude, samtang sila Charlotte B. Laride, Christine Marie R. Cabilin, ug Kristine A. Galabin nakagradwar isip Cum Laude.
Gipasidunggan ni Governor Darel Dexter T. Uy ang mga scholars atol sa usa ka programa sa Governor’s Conference Room sa Provincial Capitol isip pag-ila sa ilang paningkamot ug kalampusan sa akademya.
Ang maong scholarship program gitukod sa panahon nga si Gov. Uy pa ang mayor sa Dipolog. Sumala sa mga scholars, dako ang natabang niini sa pagpagaan sa pinansyal nga kabug-aton sa ilang mga pamilya ug sa pagtabang kanila nga mahuman ang ilang pagtuon.
Giawhag usab ni Gov. Uy ang mga graduates nga magpabiling mapainubsanon, mosalig sa Ginoo, ug gamiton ang ilang kahibalo ug talento sa pag-alagad sa katawhan ug sa pagpalambo sa ilang komunidad.(IKEN B. GULLEM)
Source: Zamboanga del Norte Provincial News Network