Naghiusa ang Department of Agrarian Reform (DAR) Zamboanga del Norte ug mga partner agency sa pagpalig-on sa koordinasyon ug pagpatuman sa mga programa alang sa mga mag-uuma ug Agrarian Reform Beneficiaries (ARBs) sa probinsya.
Gipahigayon ang monthly Provincial Agrarian Reform Coordinating Committee (PARCCOM) meeting sa New Alison’s Food Plaza, Dipolog City, diin mitambong ang mga representante sa Department of Environment and Natural Resources (DENR), Office of the Provincial Agriculturist (OPAg), mga organisasyon sa mag-uuma ug uban pang stakeholders.
Gipangulohan ni Provincial Agrarian Reform Program Officer (PARPO) II Daisy Dell Suan Digamon, kauban sila PARPO I Engr. Alfonso A. Tan ug PARCCOM Chairman Rogelio E. Balladares, ang tigom nga nagtumong sa paghiusa sa mga inisyatiba ug pagpalig-on sa inter-agency collaboration alang sa mas episyenteng paghatag sa serbisyo sa mga ARB.
Atol sa panaghiusa naghatag og update ang OPAg ug DENR sa mga isyu nga nahisgutan sa miaging miting, samtang mipresentar usab ang ubang miyembro sa PARCCOM sa kalamboan sa ilang mga programa ug umaabot nga kalihokan nga nagtumong sa pagpauswag sa panginabuhi, produktibidad ug kalig-on sa mga farmer-beneficiaries.
Samtang, gipasalig ni Digamon nga mas mapalig-on ang mga programa sa DAR pinaagi sa padayong suporta ug panagtinabangay sa mga partner agency ug stakeholders. Gipahibalo usab ni Tan ang kahimtang sa DAR taliwala sa nagpadayong energy crisis sa nasud ug mipasalig nga magpadayon ang paghatag sa serbisyo ngadto sa mga ARB bisan pa sa mga hagit.(IKEN B. GULLEM)
Source: DAR Zamboanga del Norte Province