Nagpatuman og field inspection ug validation ang Department of Agrarian Reform (DAR) Zamboanga del Norte sa nagkalain-laing infrastructure projects niini sa Mutia aron masiguro ang kalidad, pagpadayon, ug kaayohan niini alang sa mga Agrarian Reform Beneficiaries (ARB).
Gipangulohan ni Provincial Agrarian Reform Program Officer (PARPO) II Daisy Dell Suan Digamon ang kalihokan, samtang gipangunahan ni PARPO I Engr. Alfonso A. Tan sa Program Beneficiaries Development Division ang inspection ug validation sa mga proyekto.
Lakip sa gisusi ang concreting sa dalan nga adunay wings ug exception gikan sa Fundador Street sa Barangay Sto. Tomas. Gilauman nga ang proyekto makahatag og mas luwas ug mas sayon nga agianan sa mga residente ug mag-uuma, ilabina sa pagbiyahe sa ilang mga produkto ug pag-access sa mga importanteng serbisyo.
Givalidate usab sa team ang gisugyot nga bag-ong dalan nga magkonektar sa Barangay Sto. Tomas ngadto sa Purok 4, Sitio Sadego. Tumong niini nga mapalambo ang koneksyon sa mga komunidad ug mapadali ang pag-access sa mga serbisyo ug agricultural areas.
Gimonitor ug gisusi usab ang kahimtang sa nahuman nang steel bridge nga nagkonektar sa Barangays Diland ug Head Tipan aron masiguro nga padayon kini nga magamit sa mga residente ug makatampo sa ilang panginabuhian.
Mitambong usab sa inspection ang mga opisyal sa Municipal Government of Mutia, ubos sa pagpanguna ni Mayor Engr. Lorrymir S. Adasa ug Municipal Engineer Engr. Mario A. Natcher.
Sumala sa DAR, ang mga proyekto kabahin sa padayong paningkamot sa ahensya nga mapalambo ang koneksyon sa mga rural nga komunidad, mapadali ang pagdala sa mga produkto sa mga mag-uuma, ug mapalig-on ang panginabuhian sa mga ARB sa Zamboanga del Norte.(IKEN B. GULLEM)
Source: DAR Zamboanga del Norte Province