Mipahigayon og Salamat-Mabuhay Ceremony ang Department of Agrarian Reform Regional Office IX niadtong Disyembre 16, 2025 sa Valencia Hall, Palacio del Sur, Marcian Garden Hotel, aron pasidunggan ang mga empleyadong nipahulay na sa serbisyo. Ang kalihokan nagtumong sa pag-ila sa ilang dugayng pag-alagad, propesyonalismo, ug dakong kontribusyon sa pagpatuman sa agrarian reform sa rehiyon.
Gipangunahan sa mga opisyal sa DAR RO IX ang programa, diin gipasalamatan ang mga retirado nga nagrepresentar sa nagkalain-laing dibisyon sama sa Land Tenure Improvement Division, Program Beneficiaries Development Division, ug Support to Operations Division. Ang matag retirado gihatagan og plake ug token isip pag-ila sa ilang integridad, kakugi, ug papel sa pagpalig-on sa mga programa alang sa mga benepisyaryo sa agrarian reform ug komunidad sa kabaryohan.
Sa iyang mensahe, giila ni Regional Director Atty. Ramon E. Madroñal, Jr. ang dakong bahin sa mga retirado sa pagtukod sa mga kalampusan sa ahensya sa Rehiyon Nuwebe. Bisan pa sa ilang pagpanamilit sa serbisyo, nagpadayon ang ilang legasiya isip inspirasyon sa mga kasamtangan ug umaabot nga kawani sa DAR nga usa ka panumduman sa matinud-anong pag-alagad ug padayon nga pagpaningkamot alang sa kaayohan sa mga mag-uuma ug sa tibuok rehiyon. (JENIFFER JR. DELICA)
Source/Photo Courtesy: DAR Region IX