Nagpadayon ang Department of Agrarian Reform (DAR) Zamboanga del Norte sa pagpatuman sa survey operations ubos sa Support to Parcelization of Lands for Individual Titling (SPLIT) Project aron mapaspasan ang pag-isyu sa indibidwal nga land titles ngadto sa mga benepisyaryo sa agrarian reform.
Sumala sa DAR, 10 na sa 27 ka target nga landholdings sa lungsod sa Osmeña ang malampusong na-survey. Lakip niini ang mga yuta ni Michael ug Ayk Kilat nga adunay kinatibuk-ang gilapdon nga 25,656 square meters, nga andam na alang sa validation ug dokumentasyon.
Gipangulohan ni Provincial Agrarian Reform Program Officer (PARPO) II Daisy Dell Suan Digamon ang implementasyon sa proyekto sa pakigtambayayong sa RC Tollo Surveying Services, samtang gimonitor sa DAR Municipal Office sa Osmeña ubos ni Municipal Agrarian Reform Program Officer (MARPO) Antonio O. Tagulob ang padayong field operations.
Nagsugod ang survey operations niadtong Hunyo 22, ug gitumong sa DAR nga mahuman ang mga target nga survey sulod sa Hulyo isip kabahin sa paningkamot sa ahensya nga mapadali ang parcelization sa mga yuta ug mapalig-on ang land tenure security sa mga agrarian reform beneficiaries.(IKEN B. GULLEM)
Source: DAR Zamboanga del Norte Province