Nadakpan sa mga pulis ang usa ka 45-anyos nga lalaki human masakpan nga nagkupot og walay lisensyang pusil sa Sitio Bayabas, Barangay Cansuje, Argao, Cebu, sa hapon sa Hunyo 30, 2026.
Sumala sa Argao Municipal Police Station, alas 3:30 sa hapon dihang nakadawat sila og report gikan sa usa ka concerned citizen bahin sa usa ka armadong lalaki nga nagpakita og pusil daplin sa provincial road sa maong lugar.
Dihang miabot ang mga pulis, ilang nakita ang suspetsado nga nagkupot og usa ka pusil. Gipaduol kini sa mga awtoridad ug gimandoan nga ihulog ang armas, nga iyang gisunod nga walay pagsukol.
Sa dihang gipangayoan siya og lisensya o legal nga dokumento alang sa pusil, wala siya makapakita niini. Narekober gikan kaniya ang usa ka kalibre .38 nga revolver ug lima ka buhing bala sa maong kalibre.
Gidala dayon ang suspetsado sa Argao Municipal Police Station alang sa hustong dokumentasyon ug pagpasaka sa kaso. Giatubang niya ang kasong paglapas sa Republic Act No. 10591 o ang Comprehensive Firearms and Ammunition Regulation Act.
Matod ni PCOL Abubakar Udang Mangelen Jr., dako ang natabang sa paspas nga pagreport sa residente ug sa dali nga responde sa mga pulis aron mapugngan ang posibleng peligro sa komunidad. Giaghat usab niya ang publiko nga magpadayon sa pagreport sa mga kahinahinalang kalihokan aron mapadayon ang kalinaw ug kaluwasan sa lalawigan.
I via Renante Socia Lada