Naghahatag ang Department of Agrarian Reform Region IX og mga titulo sa yuta, Certificates of Condonation with Release of Mortgage ug farm machinery sa libo-libong benepisyaryo atol sa Regionwide Stakeholders’ Engagement and Consultation nga gipahigayon niadtong Mayo 4, 2026 sa Zamboanga del Norte Cultural and Exhibition Center sa Dipolog City.
Lakip sa gihatag ang katapusang batch sa 3,239 ka CoCRoMs nga mikobre sa kapin 11,000 ka ektarya ug nakabenepisyo sa 6,832 ka agrarian reform beneficiaries sa tibuok rehiyon, samtang nadugang usab ang 147 ka CoCRoMs alang sa probinsya sa Sulu. Kini nagpasabot sa pagpasaylo sa ilang mga utang sa yuta ug interes, nga naghatag kanila og hingpit nga pagpanag-iya.
Gihatag usab ang 219 ka land titles nga mikobre sa dul-an 299 ka ektarya, lakip ang 160 ka e-titles ubos sa Project SPLIT, nga nagtumong sa pagpalig-on sa indibidwal nga pagpanag-iya sa yuta ug mas epektibong pagdumala niini sa mga mag-uuma.
Dugang pa, 26 ka farm machinery ug equipment nga nagkantidad og kapin ₱11 milyon ang gihatag sa 16 ka organisasyon sa mag-uuma, samtang gipasiugdahan sa mga opisyal sa DAR nga pangunahan ni Secretary Conrado Estrella III ang maong kalihokan, nga nagpakita sa padayon nga paningkamot sa gobyerno sa pagpalambo sa panginabuhian ug kaayohan sa sektor sa agrikultura sa Zamboanga Peninsula.(JENIFFER JR. DELICA)
Source: DAR Region IX