Mas gipakusgan sa Department of Agrarian Reform (DAR)–Zamboanga del Norte ang pagpatuman sa Project SPLIT pinaagi sa 2 ka adlaw nga workshop nga nagtumong sa pagpasayon ug pagpaspas sa pagproseso sa mga yutang agrikultural nga sakop sa RA 6657, as amended.
Sentro sa kalihokan ang pagwagtang sa mga kalangan sa pag-angkon sa yuta ug pagkompleto sa mga papeles, ilabi na sa mga yutang dugay nang naghulat sa resolusyon. Pinaagi sa mas lig-on nga koordinasyon, hapsay nga pagdumala sa kahinguhaan, ug hugot nga pagsusi sa mga dokumento, gipunting sa opisina ang mas paspas nga pag-isyu sa e-titulo ug paghatag sa Certificates of Land Ownership Award (CLOA).
Gipangunahan ang workshop ni Provincial Agrarian Reform Program Officer II Daisy Dell Suan Digamon ug CARPO LTID Teodulo J. Yanoyan Jr., isip kabahin sa direktiba ni Conrado M. Estrella III nga paspason ang Project SPLIT sa tibuok nasud.
Tumong sa inisyatiba nga dili lamang mapadali ang pagproseso sa papeles, kondili masiguro nga ang mga mag-uuma makabaton na sa ligal nga titulo sa yuta nga ilang gitikad—usa ka lig-on nga lakang sa pagpalig-on sa repormang agraryo ug pagpauswag sa kinabuhi sa kabanikanhan.(JENIFFER JR. DELICA)
Source: DAR Zambonorte