Nadakpan sa hiniusang pwersa sa Cebu City Police Office (CCPO), Mandaue City Police Office (MCPO), ug Task Force HUSAY ang lima ka lalaki tungod sa paghatag og walay pagtugot nga private security services niadtong hapon sa Pebrero 12, 2026.
Ang operasyon gipangulohan ni PCOL George V. Ylanan, Officer-in-Charge sa CCPO. Ang mga suspetsado nadakpan sulod sa Chong Hua Hospital–Mandaue human sila misulay og escort o paghatag og security sa usa ka high-profile nga pasyente.
Sumala sa report, mga alas 2:49 sa hapon, gitaho sa hospital custodial security personnel ngadto kang PCOL Ylanan ang presensya sa lima ka lig-on nga lalaki nga nagpailang mga security escort ni Sean Andrew Pajarillo. Ang maong pasyente naa karon ubos sa hospital arrest human sa nahitabong vehicular hit-and-run nga insidente. Gisulayan sa mga lalaki ang pagsulod sa kwarto sa pasyente apan wala sila tugoti sa custodial officer sa CCPO.
Dali nga nakig alayon ang CCPO sa MCPO ug Task Force HUSAY nga gilangkuban sa RCSU7, IMEG7, ug RPSPU7. Pag-abot sa joint validation team sa ospital, gipangutana ang lima ka lalaki ug miangkon nga sila mga bouncer ug security escort.
Apan sa dihang gipangayoan sila og License to Exercise Security Profession (LESP) o pruweba nga rehistrado sila sa usa ka lehitimong Private Security Agency (PSA), wala sila’y mapakita nga dokumento. Tungod niini, ilang gidakop ang lima ka suspetsado ug gipahibalo sa ilang katungod sumala sa balaod.
Ang mga nadakpan gidala sa Police Station 2 sa MCPO alang sa booking procedure ug pagpasaka og kaso tungod sa paglapas sa Republic Act 11917 o ang Private Security Services Industry Act ug sa mga lagda niini.
Matod sa kapolisan, kini nga operasyon nagpakita sa ilang lig-on nga baruganan sa patas ug walay pili nga pagpatuman sa balaod. Gipasidan-an usab nila ang publiko nga ang adunay lisensya ug otorisado lang ang gitugotan sa paghatag og security services, ug ang paglapas niini mag-atubang sumala sa balaod.
Source: CCPO
I via Renante Socia Lada