Nanawagan si Evelyn T. Uy sa pagrepaso sa iskedyul sa Sardines Closed Season human niyang ipunting ang posible nga epekto sa pagbag-o sa klima ug seasonal patterns sa pangisdaan sa Zamboanga del Norte.
Gibutyag sa mayor ang maong posisyon atol sa unang provincial assessment sa implementasyon sa closed season nga gipahigayon sa Dipolog City, diin nagtigom ang mga opisyal sa lokal nga panggamhanan ug mga stakeholder sa fisheries sector.
Sumala kang Uy, importante nga padayon nga susihon ang kasamtangang polisiya aron masiguro nga kini angay gihapon sa kahimtang sa pangisdaan karon.
Gihisgutan usab sa mayor ang iyang obserbasyon sa pagdaghan sa isdang “tuloy” sa kadagatan sa Dapitan City. Bisan pa niini, iyang namatikdan nga daghan sa mga madakpan nga isda gamay pa ug dili pa angay gamiton sa produksyon sa bottled sardines.
Matud pa niya, adunay usab nakitang pagbag-o sa seasonal patterns sa pipila ka mga tanom ug prutas sa probinsya, nga posibleng may kalabotan sa epekto sa climate change.
Tungod niini, iyang gi-awhag ang mga eksperto, opisyal sa gobyerno, ug mga stakeholder sa fisheries sector nga tun-an pag-ayo kon kinahanglan bang usbon o i-adjust ang iskedyul sa sardines closed season aron mas mohaom sa kasamtangang kahimtang sa kalikupan.(IKEN B. GULLEM)
Source: Zamboanga del Norte Provincial News Network