Gipangandaman sa City Government of Dapitan ang mga prayoridad sa nutrisyon alang sa tuig 2027 pinaagi sa pagrepaso sa kasamtangang kahimtang sa nutrisyon sa mga residente ug pagtan-aw sa mga programa nga nagtubag sa food access ug food security sa siyudad.
Gihisgutan kini atol sa Second Quarter Meeting sa City Nutrition Committee (CNC) ug City Nutrition Cluster niadtong Agosto 6, 2026 sa Sangguniang Panlungsod Session Hall.
Gipangulohan ni City Councilor Alexandra Judith P. Meily ang miting, diin gipresentar ni City Nutrition Action Officer Ma. Liezel C. Balagapo ang mga agenda alang sa quarterly meeting. Mitambong usab si City Health Officer Dr. Jidda B. Chan uban sa mga miyembro sa CNC ug representante sa nagkadaiyang partner agencies.
Lakip sa gi-review ang resulta sa 2026 Electronic Operation Timbang Plus (EOPT) ug 2026 Monitoring and Evaluation of the Local Level Plan Implementation Protocol (MELLPI PRO), nga mahimong basihan sa pagplano sa mga sunod nga nutrition interventions sa siyudad.
Gitan-aw usab sa committee ang proposed 2027 Local Nutrition Action Plan aron mahibal-an ang mga prayoridad ug lakang nga angay ipatuman sa umaabot nga tuig.
Kauban niini ang pag-evaluate sa “Foodloop: Improving Local Food Access in Dapitan City,” usa ka inisyatiba nga nagtutok sa pagpalambo sa agricultural distribution ug pagsulbad sa mga kal-ang sa access sa pagkaon sa mga lokal nga komunidad.
Pormal usab nga gisagop sa committee ang bag-ong national nutrition policies ug gi-review ang mga nahimo sa siyudad atol sa bag-ohay lang nga Nutrition Month celebration.
Pinaagi sa pagbase sa mga programa sa aktuwal nga datos ug sa mga panginahanglan sa komunidad, padayon nga gipalig-on sa City Nutrition Committee ug mga partner agencies ang mga lakang alang sa mas lig-on nga nutrition programs, food security ug panglawas sa mga Dapitanon.(IKEN B. GULLEM)
Source: Dapitan City Government