Gipangunahan sa City Nutrition Division ang tulo ka adlaw nga roll-out training sa Philippine Integrated Management of Acute Malnutrition (PIMAM) niadtong Setyembre 8–10, 2026, sa Amphitheater sa Government Center, Dapitan City.
Ang kalihokan, nga gipangulohan ni Ma. Leizel C. Balagapo, nagtumong sa pagpalig-on sa kahibalo ug kahanas sa mga frontline personnel sa pag-ila, pagdumala ug paghatag og tukmang interbensyon alang sa acute malnutrition.
Mitambong sa training ang 24 ka Barangay Nutrition Scholars (BNS), lakip ang mga midwife ug nurse gikan sa City Health Office (CHO). Gihatagan sila og praktikal nga kahibalo ug mga pamaagi aron mas epektibong matubag ang problema sa malnutrisyon sa lebel sa komunidad.
Nagsilbing resource speakers sila Nutritionist-Dietitian II Alien Geil Adrienne B. Khio ug Nutritionist-Dietitian II Rosita R. Gonzalez gikan sa Zamboanga del Norte Provincial Health Office (ZDN-PHO).
Lakip sa mga hilisgutan sa tulo ka adlaw nga training ang Introduction to PIMAM, pag-ila sa Global Acute Malnutrition (GAM), Community Mobilization, Management of PIMAM, Outpatient Therapeutic Care (OTC), Moderate Acute Malnutrition (MAM), Targeted Supplementary Feeding Program (TSFP), ug Community Counseling.
Pinaagi sa maong training, padayon nga gipakusgan sa City Nutrition Division ang kapasidad sa mga BNS ug health personnel aron sayo nilang mailhan ang mga kaso sa nutritional concerns, makahatag og tukmang interbensyon, ug mapalig-on ang community-based nga mga programa batok sa acute malnutrition.
Gipakita usab sa kalihokan ang padayong paningkamot sa City Government of Dapitan, ubos sa pagpangulo ni Mayor Evelyn “Belen” T. Uy, sa pagpalambo sa lokal nga nutrition services ug pagsiguro nga mas andam ang mga komunidad sa pagtubag sa nutritional needs sa mga bata ug pamilya.(IKEN B. GULLEM)
Source: Dapitan City Government