Nakadawat og 192 ka ulo sa Ready-to-Lay (RTL) nga manok ang Salug Farmers Multi-Purpose Cooperative (SAFAMPCO) isip dugang suporta sa ilang panginabuhian ug egg production project.
Gipangulohan sa Department of Agrarian Reform (DAR) Zamboanga del Norte ang pag-apod-apod sa mga manok ubos sa Chicken Egg Production and Marketing Program sa Partnership Against Hunger and Poverty (PAHP) Project.
Ang programa gitumong sa pagtabang sa mga agrarian reform beneficiaries nga makapatukod og malungtarong panginabuhian, makadugang sa kita, ug makatampo sa suplay sa pagkaon sa komunidad.
Kabahin sa kalihokan ang pagpirma sa Memorandum of Agreement (MOA) ug seremonyal nga turnover sa mga manok. Gipangulohan kini ni PARPO I Engr. Alfonso A. Tan sa Program Beneficiaries Development Division (PBDD), ubos sa pagpangulo ni PARPO II Daisy Dell Suan Digamon.
Gihatagan usab ang SAFAMPCO og 33 ka sako nga feeds, nga adunay gibug-aton nga 50 kilos matag sako, aron masuportahan ang hustong pag-atiman ug pagpakaon sa mga RTL nga manok.
Pinaagi sa proyekto, gilauman nga mapalambo sa SAFAMPCO ang produksyon sa itlog ug makamugna og dugang kita alang sa mga miyembro niini ug ilang mga pamilya.
Mitambong sa turnover ceremony ang mga representante sa Local Government Unit (LGU) sa Salug, lakip si Sangguniang Bayan Member Myrna A. Maraon, Private Secretary ni Mayor Dr. Ruth M. Brillantes nga si Engr. Mercedario N. Pamil, ug Canawan Barangay Chairman Fredie J. Molina.(IKEN B. GULLEM)
Source: DAR Zamboanga del Norte Province