Mipakita ug lig-on nga pasalig sa kalidad nga edukasyon ang City Government of Dapitan atol sa Local School Board (LSB) miting nga gipahigayon kaniadtong Disyembre 17, 2025, ubos sa pagpanguna ni Mayor Evelyn T. Uy, diin gipadayag ang mga kalampusan ug bag-ong lakang alang sa dugang nga pagpausbaw sa sektor sa edukasyon.
Atol sa miting, gibantog ang Dapitan City sa pagka-Number 1 sa Region IX sa Grade 6 National Achievement Test (NAT), nga giila isip resulta sa paningkamot sa mga magtutudlo, eskwelahan, ug suporta sa lokal nga panggobyerno. Ingon kabahin sa pagpalig-on sa morale ug kaayuhan sa mga magtutudlo, giaprobahan sa board ang ₱10,000 incentives ug ang pagpadayon sa kontrata sa mga Job Order ug locally hired teachers pinaagi sa Special Education Fund (SEF).
Gipangulohan usab sa LSB ang mga lakang alang sa mas lapad ug mas duol nga access sa edukasyon, lakip ang pag-convert sa Bacong ug Napo Elementary Schools ngadto sa Integrated Schools ug ang panaghisgot sa pagtukod sa bag-ong National High School sa Barangay Owaon.
Sumala sa city officials, ang mga maong inisyatiba nagpakita sa padayon nga pagpamuhunan sa siyudad sa edukasyon, nga nagtumong sa mas inklusibo, kalidad, ug andam-sa-umaabot nga pagkat-on alang sa tanang Dapitanon.(IKEN B. GULLEM)
Source: City Government of Dapitan