Mipahigayon ug panaghimamat si Congressman Ian Amatong uban kang Luis Macalincag, investor sa AGBEAM Dragon Fruit, ug Bryan Thomas, CEO sa Syntegral Global Solutions, aron hisgutan ang mosunod nga mga lakang alang sa Liloy Special Economic Zone, lakip na ang posibleng pamuhunan sa mango processing.
Sa maong panaghisgot, gitutokan ang pagpalig-on sa kooperasyon tali sa pribado ug panggobyernong sektor aron mapadali ang pagpatuman sa mga proyekto sulod sa ecozone. Gilauman nga ang mga pamuhunan sa agriproseso, sama sa mango ug dragon fruit, makatabang sa pagdugang sa trabaho, pagpalapad sa merkado sa lokal nga produkto, ug pagpausbaw sa kita sa mga mag-uuma sa ikatulong distrito sa Zamboanga del Norte.
Sumala kang Cong. Amatong, andam na ang distrito alang sa Liloy Special Economic Zone ug padayon ang paningkamot sa pag-andam sa mga kinahanglanon alang sa kalampusan niini. Iyang gipahayag nga ang maong mga panaghisgot naglatid sa lig-on nga pundasyon alang sa 2026, nga gilauman magdala ug mas daghang oportunidad ug malungtarong kalamboan alang sa 3rd District of Zamboanga del Norte.(IKEN B. GULLEM)
Source: Team Adrian Amatong