Mipadayag ug pagpasalamat ang lokal nga panggobyerno sa Dapitan City human makadawat ug sulat-pasidungog gikan kang Jay Christian D. Garcia, usa ka garbuhong Dapitanon ug delegado sa 12th International Youth Exchange and Conference (IYEC 12) nga gipahigayon sa Singapore ug Malaysia.
Sumala sa city officials, ang maong sulat nagpakita sa positibong resulta sa padayon nga suporta sa siyudad sa mga programa alang sa kabatan-onan. Giila sa panggobyerno nga ang partisipasyon ni Garcia sa internasyonal nga kalihokan nakatampo sa pagpalig-on sa iyang kumpyansa, liderato ug global nga panan-aw, nga naghatag usab ug dungog sa Dapitan City sa internasyonal nga lebel.
Atol sa IYEC 12, nakadaog si Garcia sa Best Position Paper Award ug Best Cultural Performance Award, nga giila isip ebidensya nga kon hatagan ug higayon ang kabatan-onan, makahimo sila ug talagsaong kalampusan ug makadala’g bililhong leksyon alang sa komunidad.
Giingon sa panggobyerno nga magpadayon kini sa pagpamuhunan sa mga programa nga magpalapad sa oportunidad sa mga batan-on ug magpasidlak sa ngalan sa Dapitan City sa kalibutan.(IKEN B. GULLEM)
Source: City Government of Dapitan