Nagpadayon sa pagpalig-on sa innovation agenda ang City Government of Dapitan human sa usa ka exploratory coordination meeting uban sa Department of Science and Technology–Provincial Science and Technology Office (DOST-PSTO) Zamboanga del Norte ug Jose Rizal Memorial State University (JRMSU) SIDLAK Technology Business Incubator (TBI).
Ang miting gipangulohan ni DOST Provincial Director Nuhman Aljani, JRMSU KITSTO Director Ma. Corina E. Camazo, ug SIDLAK TBI Manager Prof. Yhebron. Tumong sa panaghisgot ang pag-ila sa mga posible nga kolaborasyon sa natad sa science, technology, ug entrepreneurship.
Gihisgutan sa mga partido ang mga paagi sa pagsuporta sa lokal nga mga startup, pagpalambo sa inobasyon, ug paghatag oportunidad sa mga negosyanteng Dapitanon pinaagi sa teknolohiya. Ang kalihokan nagsilbing unang lakang sa paglatid sa mas lawom nga partnership nga magpasiugda sa science- ug technology-driven development sa siyudad.
Gilauman nga ang panagtambayayong tali sa LGU, DOST, ug JRMSU maghimo ug lig-on nga pundasyon alang sa sustainable nga pag-uswag ug pagpalapad sa innovation ecosystem sa Dapitan City.(IKEN B. GULLEM)
Source: City Government of Dapitan