Temporaryong gisirado ang Dapitan City Cultural and Sports Center isip kabahin sa dakong renovation ug pagpa-uswag sa pasilidad nga gitumong sa pagpaayo sa kaluwasan, accessibility, ug kahapsay alang sa mga Dapitanon ug mga bisita, ubos sa administrasyon ni Mayor Evelyn “Belen” T. Uy.
Matod sa City Government sa Dapitan, ang maong proyekto resulta sa maampingong pagplano ug pagtuon aron masiguro nga ang pasilidad mas angay, mas luwas, ug mas episyente sa dugayng paggamit. Samtang nagpadayon ang renovation, magpadayon pa sa operasyon ang Office of the Registry of Deeds hangtod sa planong pagbalhin niini sa Dapitan City Resort Hotel o Pavilion, nga igapahibalo pa ang eksaktong petsa.
Gihangyo sa City Government ang pagsabot ug kooperasyon sa publiko tungod kay gilauman ang dugang kalihokan ug kausaban sa palibot sa lugar. Ang inisyatiba nagpakita sa tinud-anay nga paningkamot sa lokal nga pangulohan sa pagpalig-on sa public facilities pinaagi sa planado, responsable, ug malungtarong kalamboan.(JENIFFER JR. DELICA)
Source: City Government of Dapitan