Gikumpirma ang pag-apil sa mga batang atleta gikan sa Dapitan City isip kabahin sa Region 9 (Zamboanga Peninsula) delegation alang sa 2026 Palarong Pambansa, human sa ilang lig-on nga performance sa regional qualifying competitions.
Gidayeg ang kalampusan sa upat ka estudyante nga nagpamatuod sa ilang disiplina, dedikasyon, ug abilidad sa nagkadaiyang sports events, nga nagdala og dungog dili lamang sa Dapitan City kondili sa tibuok “Shrine City” nga ilang girepresentar.
Lakip sa mga nakasulod sa national stage mao si Andy O. Adasa ug Aiyanah Kate M. Hoyohoy alang sa Table Tennis (Elementary Boys ug Girls), si Rejean P. Colot alang sa Volleyball (Secondary Girls), ug si Joshua D. Almacin alang sa Athletics Long Jump (Secondary Boys).
Sumala sa mga opisyal sa sports development, ang maong kalampusan nagpakita sa padayon nga pag-uswag sa grassroots sports program sa Dapitan City, nga nagtumong sa pagpalambo sa mga batan-ong atleta nga andam makigkompetensya sa national level.
Mipadayag usab ang Dapitan City sa bug-os nga suporta ug pagdasig sa ilang mga atleta, nga giila isip mga simbolo sa kahusayan, pagpaningkamot, ug garbo sa Zamboanga Peninsula.(IKEN B. GULLEM)
Source: DepEd Tayo-Division of Dapitan