CEBU: DUHA PATAY, USA KRITIKAL SA AKSIDENTE SA MANDAUE CITY

Patay ang duha ka babaye samtang kritikal ang usa ka drayber human sa usa ka grabeng aksidente sa dalan nga nahitabo sa B. Suico Street, Barangay Tingub, Mandaue City, alas 10:40 sa kagabii, Abril 11, 2026.

Base sa inisyal nga imbestigasyon, ang trak nga Mitsubishi Fuso nga gimaneho ni Teodie Punay Ycot, 36 anyos, taga Purok 1, Consolacion, Dalaguete, Cebu, nakasinati og brake malfunction samtang nagliko paingon sa M. Ceniza Street. Tungod niini, nikalit og atras ang trak ug nabanggaan ang duha ka motorsiklo nga naa sa kilid ug likod niini.

Ang unang motorsiklo (Mitsukoshi Bonus) gimaneho ni Marvin Ocampo Dayuha, 38 anyos, uban sa iyang backrider nga si Adeline Mediana, 34 anyos. Ang ikaduhang motorsiklo (Honda Click) gimaneho ni Larry Juan Bahita, 30 anyos, uban sa iyang backrider nga si Marilyn E. Cuambot, 37 anyos.

Tungod sa kusog nga impact, nasulod ilawom sa trak ang duha ka motorsiklo. Ang mga backrider nga sila Mediana ug Cuambot nakaangkon og grabeng samad ug gidala dayon sa Eversley Childs Sanitarium and General Hospital apan gideklarar nga patay. Ang drayber sa Mitsukoshi nga si Dayuha gibalhin sa Vicente Sotto Memorial Medical Center ug karon naa sa kritikal nga kahimtang.

Samtang ang drayber sa Honda Click nga si Bahita nakalikay ug nakalukso sa oras sa insidente maong wala siya maangol. Ang aksidente nakaresulta usab sa kadaot sa usa ka balay nga gipanag-iya ni Edgardo Mercado de Guzman sa maong lugar.

Padayon pa ang imbestigasyon sa kapulisan sa Mandaue City Police Officearon matino ang dugang detalye sa insidente, samtang gihangyo ang mga drayber nga mag-amping ug siguruhon ang kahimtang sa ilang mga sakyanan aron malikayan ang susamang trahedya. Gitanggong na usab ang suspetsado nga drayber ug gi-andam ang mga kaso niini.

Source: MCPO
I via Renante Socia Lada