Nagkahiusa ang City Government of Dapitan ug Dapitan United sa pagdapit sa mga ultimate frisbee players ug teams aron moapil sa Kinabayo Festival 2026 Ultimate Frisbee Invitational Cup nga ipahigayon karong Hulyo 18 hangtod 19 sa JRMSU Oval.
Gilauman nga mapuno sa kusog nga kompetisyon ang maong kalihokan diin magpasundayag ang mga atleta sa ilang katulin, kahanas, ug teamwork sa usa ka duwa nga padayon nga nagkadako ang popularidad sa rehiyon.
Ang invitational cup magtigom sa mga koponan gikan sa nagkalain-laing lugar aron makigsangka sa duha ka adlaw nga kompetisyon nga nagpunting dili lamang sa kadaugan kondili usab sa sportsmanship ug panaghiusa tali sa mga manlalaro.
Sumala sa mga organisador, ang kalihokan kabahin sa mas lapad nga programa sa Kinabayo Festival nga nagtumong sa pagpalambo sa sports tourism ug paghatag og higayon sa mga atleta nga mapakita ang ilang talento sa nasyonal ug rehiyonal nga entablado.
Pinaagi sa maong torneyo, padayon nga gipalig-on sa Dapitan ang reputasyon niini isip sentro sa dagkong sporting events samtang gisaulog ang espiritu sa kompetisyon, panaghigalaay, ug aktibong pagkinabuhi.(JENIFFER JR. DELICA)
Source: Dapitan City Government