Gisugdan na sa Dapitan City ang pinal nga pagpangandam alang sa 2026 Dapitan City Heritage Half Marathon human sa usa ka coordination meeting nga gipangunahan ni Mayor Belen T. Uy kauban si City Administrator Danilo S. Areños Jr., Dipolog City Councilor Harrison T. Young, ug ang Trisome Events team. Tumong sa miting ang paglatid sa organisado, luwas, ug malinawong dagan sa lumba nga maghiusa sa sports, kultura, ug kasaysayan sa siyudad.
Gihatagan og dakong pagtagad ang ruta sa lumba, logistics, ug kaluwasan sa mga modagan, aron masiguro nga gawas sa pisikal nga hagit, masinati usab sa mga partisipante ang mga bantugang talan-awon, kasaysayan, ug tradisyon nga naghulma sa identidad sa Dapitan. Ang kalihokan gilaraw nga dili lamang lumba kondili usa ka selebrasyon sa kultura ug panulundon sa siyudad.
Kabahin ang Heritage Half Marathon sa serye sa mga kalihokan nga magsugod una sa Charter Day Celebration ug magpadayon padulong sa Kinabayo Festival. Pinaagi sa paghiusa sa aktibong panglawas, turismo, ug kultura, gilauman nga mamahimong usa ka mayor nga kalihokan ang lumba nga makapadani sa lokal ug bisitang modagan. Giawhag ang publiko nga maghulat sa opisyal nga pahibalo sa registration, samtang ang Dapitan nag-andam sa pagdawat sa usa ka lumba nga puno sa kasaysayan ug kadasig.(JENIFFER JR. DELICA)
Source: City Government of Dapitan