Hangtud karon Setyembre 7, padayon gihapong nanawagan ug naghangyo og tabang sa publiko ang City Social Welfare and Development Office (CSWDO) sa Dapitan City aron makakuha og bisan unsang impormasyon nga makatabang sa pag-ila sa usa ka sanggol nga babaye (foundling) nga nakit-an sa Barangay Linabo niadtong Agosto 31, 2026.
Ang bata nga temporaryong gitawag og “Catalina Banggayan” nakit-an ni G. Alvin Redilosa Banggayan sa Barangay Linabo, Dapitan City.
Base sa report sa Barangay Linabo, mga alas 3:00 sa kaadlawon, nadungog ug nakit-an ang usa ka naghilak nga sanggol sa likod nga bahin sa Sta. Catalina Chapel. Ang bata giputos og dalag nga tuwalya ug gibutang sulod sa usa ka orange nga bukas nga kahon sa sapatos.
Gidala dayon ang sanggol ngadto sa mga awtoridad alang sa hustong pag-atiman, dokumentasyon, ug pagpatuman sa angay nga mga lakang. Sa pagkakaron, ang bata anaa sa pag-atiman sa CSWDO Drop-In Center ug gipailalom sa gikinahanglang pisikal ug medikal nga eksaminasyon sa Dr. Jose Rizal Memorial Hospital (DJRMH), Dapitan City.
Mihangyo ang CSWDO sa bisan kinsa nga adunay kasayuran bahin sa pagkatawo ug pagkailhan sa bata, iyang mga ginikanan, paryente, o bisan kinsa nga mahimong makatabang sa pagpangita sa iyang pamilya nga makigkontak dayon sa CSWDO.(IKEN B. GULLEM)
Source: LGU DAPITAN CSWDO