Gipili ang Corazon C. Aquino Hospital isip usa sa mga recipient sa Asia Best Choice Award 2026 isip pag-ila sa performance, dedikasyon ug kontribusyon niini sa pagpalambo sa hospital management ug kalidad sa serbisyong panglawas.
Base sa sulat gikan sa Asia Award Foundation ug Mediatama Award Management niadtong Agosto 2026, gipahibalo ang ospital sa maong pagpili human sa selection process. Giila usab ang ilang aktibong pag-apil sa nagkalain-laing seminar ug padayong pagpaningkamot sa pagpalambo sa pagdumala ug serbisyo sa ospital.
Pormal nga ihatag ang certificate ug trophy sa awards ceremony nga pagahimoon sa Agosto 28, 2026 sa The Grand Platinum Hotel sa Jakarta, Indonesia. Ang maong pasidungog naghatag usab og pag-ila sa mga paningkamot sa ospital sa pagpauswag sa pag-atiman sa mga pasyente.
Padayon nga gipaningkamotan sa Corazon C. Aquino Hospital ang pagpalambo sa kalidad sa serbisyong panglawas alang sa katawhan, uban sa suporta sa lokal nga pangagamhanan sa pagpangulo ni City Mayor Roberto Y. Uy.(JENIFFER JR. DELICA)
Source: Dipolog City Government