Personal nga gipanghatod ni Congressman Pinpin Uy, ang mga livelihood packages sa nagkadaiyang barangay sa lungsod sa Sergio Osmeña, Zamboanga del Norte, isip pagtuman sa iyang saad nga suporta alang sa kababainhan sa komunidad, niadtong Biyernes, Hulyo 4, 2025.
Ang maong programa, nga gihimo pinaagi sa pakigtambayayong sa Department of Labor and Employment (DOLE), nagtumong sa paghatag og malungtaron ug lig-on nga panginabuhian alang sa kababainhan aron sila mahimong aktibong kabahin sa pagpauswag sa ilang komunidad.
Lakip sa mga benipisyaryo sa maong proyekto, ang Brgy. Antonino, nakadawat og training ug kagamitan alang sa Organic Vegetable Production, Peanut Butter Making, ug Squash Chips Making, samtang ang Brgy. Biayon, nakadawat og suporta para sa Food Processing,
Farming, ug Livestock Production, ang Brgy. Tuburan, para sa Farming ug Fruit & Vegetable Chips Production, ug ang Brgy. Situbo, alang sa Vegetable Production ug Restaurant & Catering Services.
Gipasabot ni Cong. Pinpin Uy, nga kini usa lamang sa daghang lakang aron masiguro ang padayon nga suporta sa kababainhan sa ilang pagpanginabuhi.
“Kini pa lang ang sinugdanan. Kung magtinabangay ta, mas daghan pa ang matabangan,” matud pa ni Cong. Uy.
Miatubang usab sa maong kalihukan si Mayor Glen Yu uban sa mga Board Members nga sila BM Jimboy Chan ug BM Dario Mandantes, isip suporta sa maong proyekto.(Jumalisa Papa)
Source: ZNPNN