Atol sa deliberasyon sa Committee on Higher and Technical Education sa House of Representatives of the Philippines nga gipahigayon didto sa Quezon City, nanawagan si Congressman Ian Amatong nga hatagan og prayoridad ang mga estudyante gikan sa poverty-stricken districts sa pag-apod-apod sa scholarship slots.
Gibutyag niya ang padayong kalangan sa validation process sa mga aplikante sa scholarship programs sa Commission on Higher Education (CHED) ug Unified Student Financial Assistance System for Tertiary Education (UniFAST), ug nangutana kon unsa na ang lakang aron mapaspasan kini.
“Ang pinagtalunan natin last budget hearing is you cannot validate. So ang tanong ko ngayon, kung meron na po ba kayong ginawang hakbang para mapabilis ang validation?”, maoy pangutana sa Congressman.
Gipasiugda usab niya nga ang mga kabus nga distrito sama sa 3rd District sa Zamboanga del Norte kinahanglan makadawat og mas daghang slots kumpara sa mas adunahang lugar.
Gipanawagan niya ang mas dakong transparency sa alokasyon, nga nag-ingon nga bisan gigamit na ang AICS isip dugang educational assistance sa ilang distrito, dili gihapon kini igo aron matubag ang panginahanglan sa mga estudyante.(IKEN B. GULLEM)
Source: Zamboanga del Norte Provincial News Network