Opisyal nga giablihan sa Department of Tourism Region IX ang Community Guiding Training niadtong Pebrero 21, 2026 sa Front View Deck sa Sindangan People’s Cultural and Sports Center, nga naghatag dalan sa pormal nga akreditasyon sa mga lokal nga tour guides sa probinsya.
Gipangulohan kini ni Dara May L. Cataluña, nga nagpadayon sa paningkamot sa ahensya sa pagpalig-on sa community-based tourism sa Zamboanga del Norte.
Mitambong sa maong kalihokan ang mga partisipante gikan sa ikaduha ug ikatulong distrito sa probinsya, nga nagpakita sa ilang tinguha nga mahimong opisyal nga ma-akreditahan isip mga tour guide human sa pagbansay nga molungtad hangtod Pebrero 27.
Lakip sa mga sesyon ang gender sensitivity nga gipasiugdahan ni Anna Angela Lacastesantos, presentasyon sa heritage tourism ni Philleta Tiempo, ug tourist safety training nga gipangulohan ni Romeo Murro, lakip usab ang earthquake drill ug Basic Life Support training.
Human sa programa, ang mga partisipante nga makakompleto sa training pormal nga ma-akreditahan sa DOT isip mga tour guide sa ilang tagsa-tagsa ka lungsod, usa ka lakang nga gilauman makapalig-on sa kalidad sa serbisyo ug turismo sa tibuok Zamboanga del Norte.(IKEN B. GULLEM)
Source: Zamboanga del Norte Provincial News Network