Mas gipakusgan ang pinansyal nga kapasidad sa mga kooperatiba sa coconut farmers sa Zamboanga del Norte pinaagi sa Financial Literacy and Financial Management Seminar nga gipahigayon sa Cooperative Development Authority (CDA), sa pakig-alayon sa Department of Trade and Industry–Zamboanga del Norte (DTI-ZDN).
Isip kabahin sa maong inisyatibo, mipakigbahin sa ilang kahibalo isip resource speakers si DTI-ZDN Business Development Division Chief Raymunda Biolango ug Negosyo Center Business Counselor Robert Dagpin, diin ilang gihatagan og praktikal nga giya ang mga partisipante bahin sa husto ug responsable nga pagdumala sa panalapi.
Gipunting sa kalihokan ang pagpalambo sa kahibalo sa mga kooperatiba sa pagdumala sa ilang pondo, pagplano sa pinansyal nga operasyon, ug paghimo og maalamon nga mga desisyon alang sa ilang negosyo.
Importante kini alang sa mga coconut farmers’ cooperatives tungod kay ang lig-on nga pagdumala sa panalapi usa ka pundasyon sa malungtarong operasyon, mas organisadong negosyo, ug dugang nga oportunidad alang sa pagtubo sa kooperatiba.
Gipahigayon ang kalihokan sa Mibang Hotel, Dipolog City, isip kabahin sa padayong paningkamot sa CDA ug DTI-ZDN nga mahatagan og kapasidad ang mga kooperatiba aron mas maandam sila sa pag-atubang sa mga hagit ug oportunidad sa negosyo.
Pinaagi sa paghatag og kahibalo nga magamit sa tinuod nga operasyon, ang mga coconut farmers dili lamang gisuportahan sa ilang produksyon, kondili gipalig-on usab ang ilang kapasidad sa pagdumala, pagnegosyo, ug pagpalambo sa ilang kaugalingong kooperatiba.(IKEN B. GULLEM)
Source: DTI Zamboanga del Norte