Sa pag-obserba sa National Correctional Consciousness Week (NACOCOW) 2025, ang Dapitan City Parole and Probation Office, ubos sa pangulo ni Chief Probation and Parole Officer Nelson C. Bedua, mipahigayon ug mga kalihokan nga nagpunting sa pagpalig-on sa re-integrasyon, pag-alagad sa komunidad, ug pagpanalipod sa kinaiyahan.
Gisugdan ang kalihokan pinaagi sa coastal clean-up activity, nga nagtumong sa pagpasiugda sa kalimpyo ug pagpakabana sa pag-amuma sa baybayon. Gisundan kini sa bloodletting activity nga gipahigayon Covered Court sa Barangay Potol nga adunay temang “Dugtong Buhay, Handog ng Subok Laya.”
Ang maong kalihokan gisuportahan sa City Health Office, Dr. Jose Rizal Memorial Hospital, ug sa lokal nga Kagamhanan sa Dapitan ubos sa liderato ni Mayor Evelyn “Belen” T. Uy.
Samtang, aktibong mipartisipar sa mga kalihokan ang 22 ka parolees ug 180 ka probationers nga anaa sa pagdumala sa opisina.
Pinaagi sa ingon nga mga aktibidad, padayon nga gipalapdan sa Dapitan City Parole and Probation Office ang mensahe sa NACOCOW— ang pagpukaw sa katawhan aron masabtan ang importansya sa rehabilitasyon ug pagtabang sa mga tawo nga nagpaningkamot nga mobalik ug mosilbi pag-usab sa katilingban.(Iken B. Gullem)
Source: City Government of Dapitan