Dili lamang pagpanglimpyo sa basura ang tumong sa 2nd Quarter Clean-Up Drive nga gipahigayon sa Dakbayan sa Dipolog niadtong Hunyo 11, kondili usa usab kini ka pahayag sa kolektibong responsibilidad sa komunidad sa pagpanalipod sa kinaiyahan.
Kabahin sa pagsaulog sa World Environment Day ug Philippine Environment Month, naghiusa ang City Government of Dipolog pinaagi sa City Environment and Natural Resources Office (City ENRO), Environmental Management Bureau (EMB) IX, mga barangay, ug mga boluntaryo sa pagpanglimpyo sa nagkadaiyang suba, sapa, ug estero sa dakbayan ubos sa Adopt-an-Estero Program.
Samtang nagpadayon ang pag-uswag sa siyudad, nagkadako usab ang panginahanglan sa pag-atiman sa mga natural nga agianan sa tubig nga adunay dakong papel sa paglikay sa pagbaha ug pagpreserbar sa kahimsog sa kalikupan. Pinaagi sa maong kalihokan, gipakita sa mga partisipante nga ang pag-atiman sa kinaiyahan dili responsibilidad sa usa ka ahensya lamang, kondili obligasyon sa tibuok komunidad.
Sa panaghiusa sa mga ahensya sa gobyerno, barangay, ug mga boluntaryo, napalig-on ang mensahe nga ang matag gamay nga lihok alang sa kalikupan adunay dakong kontribusyon sa paghimo og mas limpyo, mas luwas, ug mas malungtarong Dipolog.(IKEN B. GULLEM)
Source: Dipolog ENRO