Gipahibalo sa City Government of Dipolog pinaagi sa Traffic Management Office nga ipatuman ang no entry, exits, ug re-routing sa tanang sakyanan gikan alas 1:00 sa hapon sa Oktubre 31 hangtod alas 1:00 sa hapon sa Nobyembre 2, 2025, aron masiguro ang malinawon ug hapsay nga pagsaulog sa “Kalag-Kalag.”
Ang mga mosulod paingon sa Catholic Cemetery mahimong moagi sa Padre Ramon Street isip entrance hangtod Malvar Street Extension ug mahimong mogawas pinaagi sa Herrera Street (right) o Capitol Drive (left). Ang Katipunan Street mahimong one-way lane padulong habagatan ug mahimong gamiton isip drop-off point o exit paingon sa Quezon Avenue.
Gipahimangnoan nga dili tugotan ang pagsulod sa mga sakyanan sa mga dalan sa Tomas Claudio–Herrera (Agape area), Miputak Bypass Road–Herrera, Capitol Avenue (likod sementeryo), Quezon Avenue–Amatong Road, Herrera–Amatong Road, Echavez–Gonzales Street, ug Kagatan Road (paingon Municipal Cemetery). Gihangyo sa lokal nga pangagamhanan ang kooperasyon sa tanan aron mapadayon ang malinawon ug organisadong pag-obserbar sa “Kalag-Kalag.”(JENIFFER JR.DELICA)
Source/Photo Courtesy: Dipolog City Government