Ang ChildFund Philippines inubanan sa Lokal nga Kagamhanan ning dakbayan sa Dipolog alayon sa Population Commision Division (POPCOM) ug City Social Welfare and Development Office (CSWDO) ang mimugna sa dakung programang “Parent-Teen Talk”, Hunyo 16, 2025 didto sa Social Hall, City Hall, ning siyudad.
Ang maong programa ang gipahigayon sa ChildFund Philippines nga usa ka interaktibong estratihiya sa pagpalig-on sa komunikasyon matag habig sa mga ginikanan ug kabataan, diin kini moresulta sa mga alternatibong pamaagi sa edukasyon,subay sa paghigayon ug mga sesyon may kalabot na sa sekswal ug reproductive health sa mga kabatan- unan.
Gihingusgan kini karong mga panahona tungod sa nagkadaghan na ang kaso sa HIV/AIDS,kahibaloan paspas na usab ang pagtaas sa mga kaso sa teenage pregnancies, lakip na usab ang kaso sa daghanang mga kabatan- unang karon nga nasugamak pinaagi sa pagkutlo sa ilang kaugalingon.
Ang maong programa gitambungan nila ni Universal Restoration Church Pastor Rodolfo P. Mabbagu isip representante ni Mayor-Elect Roberto Y. Uy, Childfund Program Officer, Mr. Danilo V. Cabidog, Popcom-OIC, Ms. Rochene Marie N. Baylon, mga partisipantes gikan sa piniling mga barangay ning dakbayan ug mga facilatators gikan sa nahisgutan nga mga buhatan.
Subay niining maong programa gilauman nga mahimong mas kusgan ang panaghiusa sa pamilya ug mas andam ang ginikanan ug mga anak sa pag-atubang sa mga hagit sa pagdako sa modernong panahon aron malikayan ang kadaot sa kinabuhi sa mga kabataan pinaagi sa pag monitor sa mga ginikanan.(Angelica T. Obina)
Source Dipolog City Government