Nahidangat dinhi sa dakbayan sa Dipolog si Dr. Jose Prospero E. De Vera III, ang Chairman sa Commission on Higher Education (CHED) kaganinang buntag, Oktubre 25 ning tuiga.
Kini alayon na sa pagpahigayon sa “PADYAK BAKUNA”, subay usab sa implementasyon sa National COVID-19 Vaccination Program, diin ang CHED uban sa Department of Health (DOH), Local Government Unit (LGU) ug Higher Education Institutions (HEI), ang gidasig nga mohimo sa ceremonial vaccination sa ilang faculty, staff ug estudyante uban sa tema nga “Padyak Para sa Flexible Learning : Sama-samang Vaccination Program”.
Laraw ning nasangpit nga programa ang luwas nga pag-abri sa umaabot sa ”limited face-to-face classes” alang sa mga “tertiary students” sa mga pinili nga HEI.
Sumala ni Dr. De Vera, sa pagsugod pa lamang sa pandemya, ang CHED naningkamot na nga magpadayon ang edukasyon sa kabataan pinaagi sa flexible learning aron masiguro nga bisan dunay pandemya, padayon ang pagtuon sa mga estudyante. Apan subo nga dili tanang pagtuon makuha sa online tungod kay dunay mga kurso nga nagkinahanglan og face-to-face, ilabina ang mga dunay kalabutan sa mga laboratory courses, internship ug OJT.
Nalipay ang Chairman sa CHED nga sa pagbisita niya sa mga LGUs, nakita niya nga ang mga estudyante interesado kaayo magpabakuna, dugang niya, sa pagka karon 27% pa lamang sa mga tertiary students ang bakunado sa tibuok nasud busa gi-awhag niini nga magpabakuna na tungod kay duna na usa’y igong suplay ang atong kagamhanan karon.
Sumala usab ni Dr. Rody P. Garcia, OIC Director IV sa CHED-R9, nga dinhi sa Rehiyon 9, mikabat na sa 75.4% ang bakunadong faculty samtang 20% pa lamang sa mga estudyante ang nabakunahan apan target nga makuha ang 70% sa populasyon sa katapusang bahin ning tuiga.
Si Dr. De Vera personal nga gitagbo ni Mayor Darel Dexter T. Uy didto sa Dipolog Airport ganihang buntag sa may kapin kon kulang alas 8:30 ang takna ug gipahigayon gilayon ang motorcade palibot sa dakbayan samtang ang Ceremonial Roll-out sa bakuna didto gipahigayon sa DMC College Foundation Inc ug kini gitambongan usab Dr. Aldrin A. Darilag, Commissioner sa CHED, Vice-Gov. Senen O. Angeles nga nag representar ni Gov. Roberto Y. Uy, Mayor Darel Uy ug mga kadagkoan sa mga HEI dinhi sa Dipolog.
(Source: Dipolog City Government Facebook page)
