Gikan sa Coastlines hangtod na ngadto sa mga classrooms ang Coast Guard Station (CGS) Zamboanga del Norte sa koordinasyon sa Coast Guard Sub-Stations ug Operational Control Units, mipakita na usab sa ilang pasalig sa serbisyo sa komunidad ug pagtukod sa nasud pinaagi sa aktibong misalmot sa Brigada Eskwela 2026, gikan niadtong Hunyo 1 hangtod 5 ning kasamtangang tuig sa nagkadaiyang tunghaan dinhi ning tibuok probinsya sa Zamboanga del Norte.
Ang maong kalihokan nga nagdala sa tema nga βBayanihan sa Paaralan: Nagkakaisa para sa Kaayusan at Kaalaman,β usa ka semana nga kalihokan alang sa paghiusa sa mga personahe sa Coast Guard, kauban ang mga magtutudlo, mga ginikanan, ug mga boluntaryo sa komunidad alang sa pagpangandam sa pag-abli sa mga pasilidad sa tunghaan.
Ang pagsalmot sa sa CGS Zamboanga del Norte nagpakita sa ilang dili matarug nga dedikasyon isip mga kawani sa Philippine Coast Guard nga nagpakita dili lamang sa maritime safety ug seguridad kondili sa pagsuporta usab sa mga inisyatibo pinaagi sa boluntaryong mga serbisyo sama sa paglimpyo sa nataran sa eskwelahan, pag-ayo ug pagpintal sa mga lawak-klasehanan, paghawan sa palibot, ug pagpaayo sa mga palibot sa pagkat-on aron masiguro ang luwas, limpyo, ug maayong kahimtang sa mga magtutungha nga makapalambo sa edukasyon ug komunidad.
Ang mga personahe sa CGS Zamboanga del Norte sa tibuok kalihokan, mipakita sa ilang hiniusang paningkamot ug diwa sa bayanihan.
Pinaagi niini nga aktibidad mapalig-on pa ang panagtambayayong tali sa mga ahensya sa gobyerno, tunghaan nga mapadayon ang suporta sa mga programa nga nagpasiugda sa panaghiusa, edukasyon, ug responsibilidad sa katilingban.
Pabilin ang pasalig sa CGS Zamboanga del Norte sa pagserbisyo sa komunidad lapas sa ilang mandato sa kadagatan ug lokal nga komunidad sa pagpalambo sa kalidad sa edukasyon para sa mga kabatan-onan.(MEDALYN U. BORJA)
Source: Coast Guard Station Zamboanga del Norte