Ni-ani og pagdayeg ang Corazon C. Aquino Hospital (CCAH) tungod sa “Best Practices” nga gipatuman niini.
Kini ang nasayran gikan ni Mr. Jose Larry R. Padilla, Supervising Administrative Officer sa CCAH, atol sa usa ka eksklusibong pakighinabi niini kabahin sa nahitabong annual 22nd Hospital Management Asia (HMA) Conference 2023 niadtong Septiyembre 5 ug 6 ning tuiga didto sa Shangri-La, Kuala Lumpur, Malaysia, diin siya ang usa sa mga imbitado.
Sumala ni Mr. Padilla, gidayeg ang CCAH human siya gihatagan og higayon nga mosaysay sa mga kalamboan sa tambalanan ilabina dinha sa aspeto sa “talent management” diin sa panahon sa pandemya, gihatagan ni Mayor Darel Dexter T. Uy og increase ang suholan sa mga job order nurses gikan sa Php500.00 ngadto sa Php1,000.00 ang matag adlaw.
Malipayon usab niining gibutyag nga bugtong ang CCAH lamang ang na-imbitahan nga pam-publikong tambalanan dinhi sa tibuok Mindanao. Dugang pa nga ang maayong talan-awon sa pagdumala niini maoy makahatag og inspirasyon aron ang mga nurses dili na kinahanglang molangyaw pa sa gawas sa nasud og magpabilin na lang dinhi sa lokalidad aron makahatag og serbisyo sa mga nanginahanglan.
Gituki sa maong komperensiya mao ang 1) Quality & Safety, 2) Patient Experience, 3) Talent Management, 4) Future of Healthcare on Sustainability, Partnership, Startups, Interoperability, Data Storage and The Cloud, and Cybersecurity.
Lakip sa mga mitambong sa nasangpit nga kalihukan mao ang Ministry of Health Malaysia, Ministry of Tourism in Malaysia ug mga pribadong hospital gikan sa nagkalaing- laing mga lugar.
(Source: Dipolog City Government Facebook page)