Isip kabahin sa selebrasyon sa National Breastfeeding Awareness Month, gipahigayon sa City Nutrition Division ang “Infant and Young Child Feeding Advocacy” niadtong Agosto 12 sa Barangay Talisay Covered Court, diin gipasiugda ang kamahinungdanon sa breastfeeding ug hustong nutrisyon alang sa himsog nga pagtubo ug kaugmaon sa mga bata.
Giorganisa ang maong kalihokan sa koordinasyon sa City Health Office (CHO), Department of Health (DOH), ug City Population and Management Division (CPMD). Gitambongan kini sa mga mabdos, lactating mothers, ug Barangay Nutrition Scholars (BNS) nga gihatagan og impormasyon ug praktikal nga giya bahin sa infant ug young child feeding.
Sa iyang mensahe sa pagbukas sa kalihokan, si City Nutrition Division Head Ma. Leizel C. Balagapo mipasalamat sa mga partisipante ug giawhag ang mga inahan nga suportahan ang exclusive breastfeeding tungod sa dakong benepisyo niini sa kahimsog ug development sa bata.
Naghatag usab og mga learning session ang mga resource persons gikan sa nagkalain-laing health ug nutrition offices. Si Ainne Jane S. Tenorio, Nurse I sa CHO, mipasabot kung kanus-a magsugod ang hustong nutrisyon sa bata, samtang si Johara S. Macabani, RND, gikan sa DOH, naghisgot sa kamahinungdanon sa breastfeeding.
Si Balagapo usab nanguna sa continuing education alang sa mga BNS, ilabi na sa ilang papel sa paghatag og suporta sa mga lactating mothers ug sa pagporma sa breastfeeding support groups.
Gihisgutan usab ni CND Nutrition Officer Ma. Terisa R. Hamoy ang mga saktong pamaagi sa Infant and Young Child Feeding (IYCF) ug complementary feeding. Samtang sila Charissa C. Pagente ug Cynthia A. Acaylar sa CPMD/POPCOM naghatag og impormasyon bahin sa family planning.
Ang kalihokan mao ang sinugdanan sa usa ka serye sa information and education activities nga ipahigayon sa nagkalain-laing barangay aron mas mapalapdan ang kahibalo bahin sa breastfeeding, nutrisyon, ug early childhood development.
Padayon ang advocacy ug lecture caravan sa mosunod nga mga barangay: Barangay Taguilon sa Agosto 13, Barangay Cawa-Cawa sa Agosto 17, Barangay Polo sa Agosto 18, Barangay Sulangon sa Agosto 19, ug Barangay Barcelona sa Agosto 20.
Giawhag sa mga health authorities ang mga mabdos, mga inahan, ug health volunteers sa maong mga lugar nga motambong ug makigbahin sa mga kalihokan.(IKEN B. GULLEM)
Source: Dapitan City Government