Aron mapalambo ang kahibalo bahin sa ilegal nga pagpangisda ug mapalig-on ang pagpatuman sa mga fisheries regulations, gipahigayon niadtong Agosto 12, 2026, sa Municipality of Salug ang “Orientation on the Identification of Fish Caught by Means of Explosives and Other Banned Fish and Fishery Products.”
Nagtumong ang kalihokan sa paghatag og tukmang impormasyon ug praktikal nga kahibalo sa pag-ila sa mga isda ug fishery products nga posibleng nadakpan gamit ang eksplosibo ug uban pang gidili nga pamaagi sa pagpangisda.
Gipasiugda sa orientation ang kamahinungdanon sa hustong pag-ila sa mga isda ug produkto sa pangisdaan aron makatabang sa pagmonitor, pagpatuman sa mga regulasyon, ug pagpugong sa pagbaligya ug pagpalapnag sa mga produkto nga nalambigit sa ilegal nga pagpangisda.
Gipaambit ang ilang kahibalo ug kasinatian nila Lenjel Ben Castro, Head sa Training Unit sa BFAR-9; Arniel L. Rabe, Fishing Regulations Officer I; Mary Ann Miala, Training Specialist; ug Jeson D. Vailoces, Fisheries Technician sa Municipality of Salug.
Ang maong kalihokan nagpakita sa kamahinungdanon sa panag-uban sa mga ahensya sa gobyerno ug lokal nga komunidad sa pagpanalipod sa mga yamang-dagat ug pagsiguro sa responsableng paggamit niini.
Pinaagi sa padayon nga edukasyon ug information dissemination, gilauman nga mas mapalambo ang pagsunod sa mga balaod sa pangisdaan ug mapalig-on ang paningkamot batok sa ilegal ug makadaot nga mga pamaagi sa pagpangisda.(IKEN B. GULLEM)
Source: Municipality of Salug