Nagpadayon ang mga personahe sa Dapitan City Fire Station sa ilang pagpangandam alang sa epektibong pagresponde sa mga emerhensiya pinaagi sa 1st Evaluation sa Testing of Agility, Grit, Unity, and Readiness in Operation (T.A.G.U.R.O.) Challenge, nga gipahigayon niadtong Agosto 12, 2026.
Kabahin ang maong kalihokan sa pagpadayon sa evaluation ug training program nga nagtumong sa pagsulay ug pagpalig-on sa pisikal nga kaandam, determinasyon, panaghiusa, ug operational capability sa mga bombero.
Ubos sa pagpangulo ni FSINSP Rommel M. Rojas, REE, Acting City Fire Marshal, aktibong miapil ang mga personnel sa nagkalain-laing hagit isip kabahin sa ilang padayon nga pagpalambo sa kahanas ug kapasidad sa pag-atubang sa emergency situations.
Pinaagi sa regular nga training ug evaluation, gipunting sa fire station ang pagpalambo sa agility, endurance, teamwork, discipline, ug resilience sa mga personnel. Kini nga mga kapasidad importante aron masiguro ang paspas, organisado, ug epektibong pagresponde sa panahon sa sunog, rescue operations, ug uban pang emerhensiya.
Gipasiugda usab nga ang matag evaluation dili lamang pagsukod sa pisikal nga abilidad, kondili usa ka oportunidad aron mapalambo ang pagsalig sa kaugalingon, koordinasyon, ug panaghiusa sa mga miyembro sa fire service.(IKEN B. GULLEM)
Source: BFP R9 Dapitan City Fire Station