Mipagawas ug opisyal nga tubag o pamahayag ang Bureau of Jail Management and Penology (BJMP) Dipolog City Jail Male Dormitory sa mitumaw nga ang unod sa sulat naghisgot sa pag alegar sa dili maayong pagtratar sa usa ka piniriso nga bag-uhay palang nga nag viral sa social media, usa sa gikahisgutan sa mga alegasyon sa giingong dili patas nga pagtratar sa usa ka Person Deprived of Liberty (PDL) ug mabasa didto sa sulat ang mga gipanghisgutan nga mga pangalan sa mga personnel.
Ang BJMP Dipolog nagpagawas ug pamahayag ngadto sa publiko nga ang maong mga alegasyon aduna nay gihimong imbestigasyon sa hingtundan nga buhatan.
Matud pa nga ang tanan gihimoan na nila ug action aron mahibaloan ang kamatuoran ilabina nga adunay nahilakip nga mga personahe.
Gipaniguro usab sa BJMP Dipolog ang ilang dakong responsibilidad sa pagpanalipod ug pagdumala sa mga PDL. Gipasalig sa buhatan nga ang tanan nilang desisyon ug mga lihok pinasikad sa pagrespeto sa tawhanong katungod, kaangayan, ug pagsunod sa balaod alang na sa mga PDL.
Ang BJMP Dipolog nagpabiling mubarog sa ilang pasalig sa transparency, integridad, ingon man dignidad alang na sa pagtratar sa mga PDL. Ilang ipasalig ngadto sa katawhan nga ang tanang pamaagi ug proseso sa ilang pasilidad nagsunod sa saktong pamaagi aron maprotektahan ang seguridad sa matag katungod sa mga piniriso.
Ang BJMP Dipolog gapasabot usab sa ang ilang komitment ngadto sa mga piniriso nga masiguro ang pagpatuman sa makatawhanong katungod ngadto sa mga PDL ug sa paghatag ug kahigayonan kanila aron makapangandam sa ilang pagbalik ngadto sa komunidad ug sa ilang pamilya.(Angelica T. Obina)
Ctto: BJMP MALE DORMITORY DIPOLOG CITY