Aktibong misalmot ang Bureau of Fire Protection Regional Office 9 (BFP R9), pinaagi sa Dipolog City Fire Station, sa HIMAMAT Festival 2025 nga gipahigayon sa Zamboanga del Norte National High School – Turno Dipolog City niadtong Hulyo 18, 2025.
Gipangulohan ni FCINSP Rommel S. Carpio, City Fire Marshal sa Dipolog City, ang partisipasyon sa mga fire personnel sa maong kalihokan nga gimugna sa Humanists’ League uban ang tema nga “HIMAMAT 2025.”
Ang festival usa ka team-building event nga nagtumong sa paghiusa sa kabatan-onan, mga magtutudlo, ug komunidad pinaagi sa kalihokan nga puno sa kalingawan, kultura, ug pagtinabangay.
Ang maong kalihokan usa ka ehemplo sa ilang tinguha nga molapas sa tradisyonal nilang mandato sa pagsiguro sa kaluwasan sa sunog, ug makiglambigit sa mga programa sa komunidad nga nagpalig-on sa kahimsog, edukasyon, ug panaghiusa sa katawhan.
Gipasiugda sa kalihokan ang kalipay, pagpakig-ambitay sa kultura, ug panaghugpong sa tanang partisipante—nagpamatood sa dakong papel sa panaghiusa aron mapalambo ang espiritu sa komunidad.
Pinaagi sa aktibong partisipasyon, gipalig-on sa BFP R9 ang ilang papel isip kasaligan nga kauban sa kalinaw, kaluwasan, ug kalambuan sa katawhang Dipolognon.(Jumalisa Papa)
Source: BFP Region 9 Dipolog City Fire Station