Mikabat sa 2,775 ka pamilya gikan sa upat ka barangay sa Dapitan ang nakabenepisyo sa “Benteng Bigas Program,” nga naghatag og bugas sa kantidad nga ₱20 kada kilo aron makatabang sa pagsaka sa presyo sa palaliton.
Matud pa sa lokal nga pangagamhanan, mikabat sa 555 ka sako sa bugas ang naipang-apod-apod, diin 195 ka sako ang nadawat sa Barangay Barcelona, 187 sa Barangay Ilaya, 87 sa Barangay Hilltop, ug 86 sa Barangay Ba-ao.
Tumong sa programa ang pagpalig-on sa food security ug paghatag og diretsong tabang sa mga panimalay nga apektado sa inflation, pinaagi sa pagpaubos sa gasto sa ilang adlaw-adlaw nga pagkaon.
Gipahigayon kini pinaagi sa panagtinabangay sa mga lider sa probinsya ug siyudad, lakip si Governor Darel Dexter T. Uy, Congressman Roberto “Pinpin” Uy Jr., ug Mayor Evelyn “Belen” T. Uy, nga nagpaluyo sa mga programang naghatag og direktang kaayohan sa katawhan.
Gilauman nga pinaagi sa padayon nga implementasyon sa Benteng Bigas Program, mas daghang pamilya pa ang matabangan ug mapalawom ang seguridad sa pagkaon sa Dapitan, ilabi na sa panahon sa pagsaka sa presyo sa mga batakang panginahanglanon.(IKEN B. GULLEM)
Source: City Government of Dapitan